22 Mar 2010

KKN: JAG for ba oan-feto Zenilda, Joe fo ba feen Kathleen


Relatorio Komisaun Inkeritu, PD Lakohi Asina Tamba Arsenio Bano

Dili flash, Rezultadu final konaba Komisaun Inkeritu Parlamentar (KIP) ba kazu distribuisaun fos nota katak familia Primeiru Ministru no Ministru Ekonomia Dezenvolvimentu hetan tender distribui fos liu husi sistema Single Source.

Deputadu Partidu Demokrata (PD), Tereza de Carvalho rekuinese katak nia lakohi asina relatoriu KIP tanba relatoriu ne’e indika involvimentu Primeiru Ministru nia oan, Genilda Gusmão no Ministru Ekonomia Dezenvolvimentu nia kaben, Chatlyn Goncalves iha distribuisaun fos ho sistema single source.

“Ami la konkorda tanba iha relatoriu ne’e temi fali Ministru nia kaben no Primeiru Ministru Xanana nia oan. Hau hanoin ne’e ladiak”, dehan Deputada Aliansa Maioria Parlamentar (AMP), Foin lalais ne’e iha Parlamentu Nasional. “Tanba ita persiza hadia sistema, maibe labele temi naran tanba ema ne’e (Chatlyn ho Genilda) desde uluk sai ona emprezairu”.

Razaun seluk deputadu ne’e lakohi asina relatoriu KIP ne’ebe prezidi husi deputadu Fretilin Arsenio Bano, Tanba konsidera nakonu ho emosaun no interese politika.

Nia dehan relatoriu ne’e la reprezentativu tamba kontiudu relatoriu balun mai husi opiniaun hamutuk no laiha diskusaun klean no votasaun ba rezultadu final antes hato’o ba meza parlamentu.

Tereza konkorda atu servisu hamutuk atu hadia sistema tanba rekuinese iha prosesu distribuisaun fos mosu duni iregularidade barak konba mekanismu jestaun.

Maibe la signifika atu akuza direita ba membrus governu no fo todan ba ema balun tanba ejijensia ne’ebe mosu iha momentu ne’eba, emerjensia atu atende duni situasaun hamlaha ne’ebe ameasa ba povu.

Asina relatoriu KIP ne’e mak hanesan, Arsenio Bano (Fretilin), Jose Texeira (Fretilin), Duarte Nunes (CNRT) no Corneilo Gama “L7” (UNDERTIM).

Fontes konfirmadu ne’ebe involve iha komisaun ne’e katak rezultadu ba KIP paradu tamba membrus balun husi bloku AMP lakohi asina relatioriu ne’e indika familia membrus governu balun.

Prezidenti Parlamentu rasik rezeita simu relatoriu inspesaun KIP ba prosesu distribuisaun fos estadu tanba laiha asinatura kompletu husi membrus komisaun inkeritu parlamentar balun.

Fernando Lasama konsidera servisu KIP la diak no liu tiha prazu, tanba KIP hahu mandatu iha fulan Agostu to’o Outobru 2009 nomos prolonga fulan ida husi 17 Novembru to’o 17 Dezembru maibe Prezidenti Inkeritu Parlamentar, Deputadu Aresnio Bano foin hatama relatoiru ne’e ba meja PN iha 9 Marsu 2010.

“Hau konsidera ne’e la’os relatoriu maibe ne’e hanesan dokumentus tamba relatoriu balun la asina, ho konkluzaun katak KIP la kumpri no la hala’o servisu ho diak”, katak Lasama.

Membru ne’ebe lakohi asina relatoriu KIP ne’e mai husi Partidu Demokrata (PD), Conselhu Nasional Rekonstruksaun Timor (CNRT), Partidu Sosial Demokrata (PSD).

KIP hahu nia mandatu iha fulan Julhu hafoin pose ba deputadu nain (10) Arsenio Bano, hanesan prezidenti KIP, Vise Carmelita Moniz (CNRT) no Tereza de Carvalho (PD), membru Hermes Baros (PSD), Aicha Baserewan (Fretilin), Duarte Nunes (CNRT), Domingos da Costa (ASDT), Domingos Musquita (PUN), Jacob Xavier (PPT) no Jose Texeira (Fretilin).

Iha prosesu inkeritu ekipa KIP halo ona inkeritu ba Ministeriu Finansa, Ministeriu Komersiu no Industria no Ministeiru Solidariedade Sosial inklui kompanha Trez Amigos.

Deputadu Duarte Nunes ne’ebe asina relatoriu ne’e komenta katak Prezidenti PN Lasama lakohi simu relatoriu ne’e tamba liu ona prazu no membrus balun lakohi asina.

Tanba ne’e nia dehan karik iha relatoriu ne’e mosu failansu ruma diak liu perpara fali auditoria ida espesial atu nune’e bele kontinua prosesu inkeritu. (News Edited STL 20/03)

17 Mar 2010

Hotel Turismo: JAG kontinua buka apaga istoria libertasaun

Hotel Turismo foin daudauk taka metin ona. Lae ona, otel ne halao servisu hanesan nia halo iha tempu Portugal nian. Otel ne reziste hanesan funu nain ida iha tempu Bapa nian. Fatin ne sai fatin ba revolusionariu sira atu dada malae sira husi liur para fo sai ba mundu katak Bapa sira atu invade daudauk. Fatin ne fatin istoriku. Maibe ema balu lakohi fatin ne atu rai nafatin memoria luta ukun an nian. Tanba razaun barak. Tanba sira hare fatin ne hanesan oportunidade atu halo osan ba sira an rasik. Maibe tanba mos fatin ne reprezenta simbol ida tan ba luta ukun rasik an nian. Ema balu lakohi atu hare bebeik fatin ne tanba fatin ne fo hanoin sira no mos fo hanoin ba Timor oan hotu, saida ma ema balu halo durante Bapa nia tempu; katak ema balu lakohi Timor-Leste atu ukun rasik an. Ema sira ne lakohi Hotel Turismo ka, Tasi Tolu ka, fatin-fatin saida deit atu fo hanoin sira kona ba sira nia traisaun ba Povu Maubere. Agora sira buka maneira para apaga istoria luta ukun an nian. Triste bot liu ba Timor-Leste, maun bot heroi ukun rasik an nian, Sr. Jose Alexandre Gusmao, mak sai hanesan sira nia patraun bo. JAG mak fo kbiit ba ema sira ne atu viola ita nia istoria. Maluk sira. Hadeer ba!!! Imi hetan ona kadeira. Imi hetan ona osan. Imi hetan ona Pajero ho Prado. Husi ami nia istoria!!! BASTA!!!

Istoria kona ba Hotel Turismo ne blog TATOLI fo sai uluk iha tinan 2009. Bele le hikas fali iha posting ida nee: Korrida atu hadau Hotel Turismo...

16 Mar 2010

Pacote Referendum La Benefisia Povu!!!

JAG laos deit inkompetente maibe iha mos tendensia ida atu buka satisfas uluk interese emprezariu sira nian. Emprezariu sira ne mesak JAG nia kolega ka familia deit. JAG ho emprezariu sira ne hamutuk hodi kungfu fali emprezariu kikoan sira iha distritu. Lori osan povu Timor-Leste nian, JAG servisu maka'as atu habokur ninia maluk sira. Kuandu ema temi KKN, ema refere ba hahalok sira hanesan JAG halo daudaun.

Uluk funu iha ai laran dehan atu defende povu Maubere nia direitu. Ikus mai independensia, povu Maubere lae ona. Familia, emprezariu bot sira, ema Indonezia mak diak fali.

12 Mar 2010

Dezgovernasaun ho Nauksaun iha JAG nia AMP

Enkuantu maun bot ba happy happy...
Gil Alves lakohi Sefi Suku sira fa'an fos...
Mario Carrascalao lakohi MTCI fa'an fos...
Lasama hakarak ministru rezigna an...
JAG lakohi remodela ministru...
Emilia Pires Ninja lakon tiha $3.000.000...
Alfredo Pires dehan negosiasaun GSR ninia kusta...
Longuinhos Monteiro lao pamer kilat tun sae...
Povu kik sosa fos labele...



10 Mar 2010

Se los mak diriji AMP?

Carrascalao dehan governu AMP korruptu (karik inklui mos nia)...
Membru AMP husu atu disolve sira nia rejime AMP...
Gil Alves fo perdua ba ema nebe komete krimi konforme nia hakarak...
Amprezariu sira manipula presu fos konforme sira hakarak...

Chefi bot AMP nian iha nebe los?...

Talves Sr. Primeiru Ministru, Jose Alexandre Gusmao, iha liu tempu ba hiburan duke kontrola ninia AMP nebe atu dada nasaun ba rai kuak?

Povu dehan Gil Alves bosok ten!

Ironikamente, iha duni Liquisa ne mak iha 1999, Gil Alves nudar portavos BRTT, nega tiha katak milisia sira laos responsavel ba ataka refujiadu sira iha igreja Liquisa hodi oho ema 60 resin!!!

9 Mar 2010

Iha Timor-Leste, Gil Alves manda...

Gil Alves mak manda iha Timor-Leste. Bainhira Komandante Jeral PNTL, Sr. Longuinho Monteiro ba monta operasaun iha Bobonaro ho Suai hodi buka "Ninja", iha Dili laran ninja fatu-gravatadu sira sibuk uza no abuza poder Estadu nian hodi naok Estadu atu hariku sira nia an. Gil Alves iha poder atu hanehan Hercio Campos, eis-portavos BRTT nebe agora kaer pasta hanesan Ministru iha governu AMP, afirma. Hercio Campos ho Tony Lay nia sala saida? Sira uza logo governu nian hodi hatama subar fos! Krimi! Maibe Gil Alves iha ninia deklarasaun uluk dehan nia fo perdaun ba Hercio Campos. Fo perdaun ba naokten sira? Laos ida ne servisu tribunal nian? Tansa mak Komandante Jeral PNTL la ba monta mos operasaun ida hodi silu Sr. Hercio Campos ho Sr. Tony Lay?

Kuitadu. Uluk iha bapa nia tempu se mak terus liu? Sim. Povu kik-kiak sira iha foho mak terus liu. Ho sira nia kiak, sira tenki servisu iha tos atu hetan netik hahan ituan ba sira nia kabun, hodi subar asuain FALINTIL sira, hodi se an hasoru bapa sira. Ikus ne povu kik-kiak sira mak terus dala ida tan. Sira halerik hahan laiha, governu AMP fo sai kontratu fos atu alevia sira nia sofrimentu. Maibe fos ne la to tan sira nia knua. Fos paradu hotu iha Dili. Lukru husi kontratu sira ne senhor sira hanesan Hercio Campos ho Tony Lay mak tolan tomak. Depois ida ne sei la to. Foin daudauk haruka tan PNTL ba hurlele sira. Ba kaer ema arbiru deit, sein iha mandatu husi tribunal, depois tortura ema sira ne. Ita hakarak hare, hanesan Sr. Hercio nebe komete krime hodi halo manipulasaun ho uza simbolu RDTL nian, se PNTL tun ba ho kilat naruk hodi silu nia ba rai, hoban nia iha tasi laran, sulan nia iha sela? Lae. La hetan boy. Sr. sira hanesan Hercio Campos iha ligasaun ho ema bot sira, hanesan Sr. Gil Alves. Sira ho sira mak bele koalia ba malu tanba iha Timor-Leste Independente, sira mak sai fali nain ba nasaun ida ne. PNTL agora sira mak komanda, sira tau PNTL hanesan sira nia instrumentu atu hanehan populasaun, povu nebe mate-moris hakarak ukun rasik an.

Fos! Ida ne mak povu barak nia halerik, liu-liu sira nebe kik no kiak iha foho neba. Lori ema sira ne nia naran mak JAG justifika politika oioin hodi hasai osan fo ba "empresario" sira atu ba sosa fos. Ohin osan juta atus ba atus sai ona, pofu sei halerik nafatin: Fos! Iha fos nia kotuk, Gil Alves ho empresario sira hanesan Hercio Campos mak kontrola. Ita la hatene ona ema sira ne ba hola sira nia direitu ne iha nebe? Se mak fo poder ne ba sira? Hanusa mak iha tempu ukun rasik an, kuandu ita hotu tuir lolos sente ita nia an livre ona husi ema at sira ne, ema at sira ne sei sae nafatin ita? Ukun rasik an ne ninia sentidu lolos lakon tiha ona ba nebe? Ida ne mak ukun rasik an ka? Atu povu maioria halerik nafatin enkuantu senhores sira hanesan Gil Alves ho Hercio Campos halo estadu ne hanesan sira nia projeitu?

Husu bot ba maun bot, Dr. Aderito de Jesus Soares halao lalais ninia servisu hodi hamenus tiha injustisa bot sira hanesan ne. Ita hein katak Dr. Aderito la sai hanesan Ir. Mario Viegas Carrascalao nebe ibun mak bot maibe laran la fo ba ninia servisu.

Osan gasta mak gasta daudauk ne. Sr. sira mos hetan daudauk proyek hodi sosa imi nia BMW, Prado ho Pajero. Povu la husu buat barak ida. Sira husu mak etu bikan ida loron ida atu sira mos goza netik ho ukun rasik an nebe sira nia maun alin sira mate ba, no sira mos sai vitima bapa (imi) nian.


AMP + JAG = Inkompetentes

Inflasaun atinji 7% maibe ekonomista AMP nian dehan kresimentu ekonomia atinji 12 too 16%, Makas liu fali pais industrialisadu sira seluk hanesan China ho USA! Governu AMP arbiru duni. Organija deit fa'an fos to agora lakonsege. Krizi fos dehan liu ona iha tinan kotuk. Tinan ida nee tansa problema fos lahotu hela deit. Gasta osan besik 100 juta dolar liu no sosa 140 mill toneladas liu tiha fos nebe timor laran tomak presija maibe fos ba hotu nebe? Lakleur tan keta mosu fali krize simenti. Agora folin simenti aumenta to 8 USD saka ida. Karik ida ne konpirasi ida hodi nunee governu sei fo fali subsidio ba simenti hanesan fos? Se mak sei manan ho subsidiu ne? Ministros AMP sira involve ho emprezarios sira hodi halo negosio fos. Tuir mai sementi? Loke matan!!!

6 Mar 2010

Pacote de Referendum

JAG justifika Pacote de Referendum ho razaun rua: 1) Atu ajuda emprezarou lokal sira hodi hakbiit sira nia empreza; 2) Atu hadia infraestrutura rai laran nian. Rezultadu mak iha kraik ne:









Estrada ba Presidente PN, Sr. Fernando Lasama nia uma privada.

Rezultadu: Emprezariu sira, maioria iha ligasaun ho JAG secara politikamente (kroniisme) no mos secara familia (nepotisme), sai riku matak. Infrastrutura nebe tuir lolos atu hadia povu kiik-kiak nia moris, la implementa.

Satu-Kosong ba Povu Timor-Leste!

Foto seluk tan bele hetan iha Facebook.

Konspirasaun sinistra entre Partido Democratico (PD) ho Bua Malus

Longuinhos Monteiro ho PNTL ba monta operasaun iha Bobonaro ho Covalima atu buka kaptura Ninja. Entretantu populasaun ba kaer fali suspeitu sira ne balu iha Ainaro, iha koordenador jeral PD distritu nia uma.

“Ami Mak Kaptura Komandante Bua Malus, Laos PNTL”

CJITL Flash, Reprezenta Populasun husi distritu Ainaro, Anselmo Quintao hateten katak hakarak fo sai informasaun klaru ba publiku konaba kapturasaun Karau Timor iha Distritu Ainaro Soro ne’e la’os Polisia Nasional Timor Leste maibe joventude sira mak kaptura.

Anselmo haktuir ida ne ba jornalistas hafoin mai fo deklarasaun ida iha Parlemetu Nasional, Sexta (05/03).

“Komunidade ho Joventude kaer Komandante Jeral Buamalus nian iha Ainaro Soro, bainhira Policia sira halo operasaun iha Distritu Bobonaro ho Suai nia halai fila ba Ainaro hodi ami kaer nia hodi intrega ba policia operasaun, komandante Buamalus Malus ne subar duni iha Kordenador Jeral PD naran Siku nia uma” dehan Anselmo.

Anselmo mos hatutan katak, bainhira atu halo operasaun sira simu apelo husi komando operasaun PNTL katak joventude ho povu ne’ebe hetan informasaun konaba ema ne’ebe deskonhesidu tenke kaptura tuir Lei no Ordem.

“Ami kaer tiha ema ne’e intrega ba iha Komando Jeral Longinhos Monteiru iha Suai no ami simu fali orden hosi sira dehan Membru Karau Timor nian labele halo operasaun to 24 jam, agora PNTL husik fali membrus sira ne’e, to’o agora ami nia populasaun iha Suku Soro tur la hakmatek tanba ema ne’ebe ami kaer Policia sira husik fali” Haktuir Quintao (Madalena/CJITL)

5 Mar 2010

Gil Alves han Dolar, Povu kesi kabun to dolar

Rezultadu husi JAG nia politika sosa mak ida ne. Fos folin sae as liu fali no sirkula iha Dili laran deit. Povu kik sira laiha nafatin akses ba fos maski JAG gasta osan juta ba juta hodi sosa fos no agora kontinua nafatin sosa fos ne. Kontratu sosa fos ikus mai lori rezultadu ba ema ida ka rua deit hanesan Germano da Silva (CNRT), Kathleen Gonçalves (PSD, ministru nia fen), Frans BTK (ema Jawa, JAG nia amigu diak), Nilton Gusmao dos Santos (JAG nia sobrinyu).

Ikus mai ita husu. Politika fos ne ninia objetivu mak saida los? Atu alevia pobreza nasaun nian ka atu fo kontratu ba familia no kolega sira?




Osan lakon hela deit, maibe naok ten laiha?

Hanesan ho istoria Ninja iha foho. Ninja lao lakon mosu mais Longuinhos Monteiro la konsege kaer ninja nia te rohan ida mos lae. Tan deit ninja, Maubere kiak balu sobak rai hemu tasi ben. Istoria ninja sai fali hanesan palku ba Longuinhos ho ninia elementu sira halo tempat latihan militer.

Sr. Mario, talves osan $3.000.000 lakon ne NINJA mak naok karik? Nusa la telfone deit ba Irmaun Long?

Tasi Tolu: Uluk Fatin Istoriku, Agora Ema Seluk nia Kusta


Maluk Timor-oan ida hatete nune kona ba Tasi Tolu iha tempu ukun-an nian:

A 'privatização' do património público em Timor-Leste chega ao auge do descaramento onde um contracto de concessão, no mínimo mal avaliada quanto ao seu benefício público, em dias se transfora em propriedade privada, à inglésa e em letras maiúsculas. Mais uma razão para reivindicar o cancelamento das obras?

Se los mak la konyese Tasi Tolu? Iha fatin ne iha bapa nia tempu sai fatin nebe bapa sira lori Timor-oan ba oho. Oho tiha Timor-oan sira, bapa sira ke duni rai kuak iha fatin ne hodi hakoi sira. Iha 1989 Papa Joao Paulo II mai visita Timor-Leste mos halo misa iha fatin ida ne. Iha duni Tasi Tolu ne, durante misa Amu Papa nian, mak Juventude Loriku Asuwa'in sira halao sira nia kampanye hodi fo sai ba mundu tomak katak iha Timor-Leste, A Luta Continua. Ikus mai iha 2002, Timor-Leste hahu ninia restaurasaun ba independensia iha duni Tasi Tolu ne.

Se mak haluhan ona katak iha tempu ida, tasi ben iha Tasi Tolu fila an sai mean tanba ran nebe Timor-oan sira fakar ba tanba kilat musan bapa nian? Parese Timor-oan sofre nain sira la haluhan. Se los mak haluhan mak lider sira nebe agora osan lanu hodi halakon hotu sira nia respeitu ba istoria terus povu Timor-Leste nian. Ohin loron lider sira ne goza ho independensia tanba ema seluk entrega sira nia vida tomak objetivu ida ne.

Letra mean iha plaka iha leten ne fo avizu ba ema hotu-hotu katak fatin ne ema seluk nia kusta ona. Laos ona Timor-oan sira nian. Se karik Timor-oan ruma hakarak ba hamrik iha fatin ne hodi hanoin hikas fali sira nia maluk nebe mate iha fatin ne, sira tenke ba husu lisensa ba rai nain. Se mak rai nain ne? Pelican Resort. Laos Timor-oan. Laos estadu Timor-Leste. Maibe ema husi rai seluk, nebe lori sira nia osan hodi sosa kotu rai ne.

Fatin ne nia folin hira? Parese ba lider sira iha AMP, fatin ne nia folin bele sukat ho DOLAR. Ba Timor-oan sofre nain sira nebe lakon sira nia maluk iha fatin ne? Fatin ne folin laek. Diferensa mak ne: lider balu iha AMP la hatene fatin ne nia folin lolos tanba sira laos Timor-oan sofre nain, sira nia maluk la mate iha fatin ne. Sira laiha ligasaun emosional ho fatin ne. Fatin ne laiha signifikadu ba sira. Lider AMP sira seluk, maski sira iha ligasaun makas ho fatin ne, ohin loron osan lanu ona sira. Sira bele fan sira nia maluk Timor-oan sira ba osan (hanesan daudauk proposta atu fan feto Timor sira ba Malaysia atu sai pembantu). Ida ne mak diferensa bot. Karik Timor-Leste merese atu iha lider sira hanesan ne? Karik ema sira ne merese atu sai lider ba Timor-Leste? Maluk ida-ida mak hanoin deit ba.

Foin daudauk, bainhira Pelican Paradise komesa hahu sira nia obras iha fatin ne, sira ke sala hodi hetan mate-ruin lubuk ida. Mate ruin sira ne mai husi tempu bapa nian, durante tempu ida kudandu bapa sira oho ema barak iha Tasi Tolu. Ema barak iha Timor-Leste, liuliu sofre nain sira, husu atu governu taka lai konstrusaun hodi, pelomenus, fo netik respeitu uitoan no mos dignidade ituan ba vitima invazaun ho okupasaun Indonezia nian. Laos vitima deit, maibe heroi ukun-rasik-an nian, ema sira nebe prontu atu fo sakrifisiu bot liu atu ita bele ohin loron goza iha nasaun ida ne.

Ita hein katak Timor-oan hotu-hotu, sofre nain ka laos sofre nain, iha korajen atu hakilar ba lider sira, liuliu lider AMP sira nebe hamahon an iha JAG nia kalilin: BASTA!!! Imi iha ona buat hotu-hotu, imi hetan ona kadeira, imi hetan ona osan, imi goza ona ho independensia nebe ema rihun ba rihun mate ba. Maibe imi labele hamos Timor-Leste nia istoria!!! Tasi Tolu fatin istoriku no fatin Santu, laos AMP nia kusta. Tasi Tolu tenki fila fali ba Timor-oan sofre nain sira, laos fan ho folin laek ba Pelican Paradise. Timor-oan nia ran, Timor-oan nia sofrimentu, laiha soi ida iha mundu mak bele sosa!!!

AMP/JAG ho Gil Alves: Inkompetente ka KKN?

Gil Alves ho JAG hasai despaxu hodi estabelese presu fos, no se mak bele fan.
Maibe iha realidade....
Se fos ne estadu fan $11.50, maibe iha Suai sira fan $18-$20, se los mak naok $6.50-$8.50 ne?

Se los mak manda iha Governu AMP?

Karik AMP nia signifika lolos mak Aliansa Maioria Pro-KKN...???

Timor-Leste se nian los?

Fos halo ema barak riku. Tinan 24 Maubere sira luta, ikus mai ema sira ne mak goza ho independensia. Sira halo KKN husi kotuk hodi naok osan nasaun nian, Maubere sira tur kesi kabun tanba osan laiha atu sosa fos. AMP ho JAG entrega nasaun Timor-Leste tom'tomak ba ema sira ne nia liman. Ida ne mak JAG deklarak "libertada a patria, libertamos o povo"? Karik JAG nia intensaun maka liberta patria para hariku ema sira ne iha Povo Maubere nia leten?


P.S.: Keta haluhan. Foin daudauk JAG monta Longuinhos Monteiro iha PNTL atu estabelese oraganizasaun paramilitar ida hodi hanehan Povo Maubere. LM/PNTL ne hanesan JAG ho AMP nia liman besi atu hanehan ema kiak-kiik sira hodi konsolida ema sira hanesan Gil Alves ho ninia kroni sira iha sosiedade Timor-Leste nian. Matan moris neon nain!!!