Tatika Suharto nian kontinua ho Jose Alexandre Gusmao alias JAG

Iha bapa nia tempu, hakbesik ona ba Referendum, bapa ho Intel sira komesa buka estratejia foun atu hamosu konfuzaun iha povu nia let. Bapa sira halo ida ne bainhira sira hamosu partidu nasionalista Timorense ka PNT. PNT dehan sira mak FRETILIN nebe buka Terseira Via. Terseira Via mak Otonomi Khusus nebe Timor oan tomak rezeita iha REFERENDUM 1999.

Bapa ho Intel sira hamutuk ho PNT ba hasae bandeira RDTL iha BP7 dehan mak ne ona. Timor oan tomak hadomi FRETILIN, nebe liu husi PNT, agora hakarak otonomi khusus.

Hanusa mak FRETILIN bele hakarak fali otonomi khusus? Klaru katak FRETILIN sei luta mate ka moris ba ukun rasik an. Ida hakarak otonomi khusus ne mak PNT, nebe bapa sira sosa kotu ona atu lori Timor-Leste ba otonomi khusus. Sira uza bandeira RDTL ho FRETILIN atu halo konfuzaun iha povu nia let.

Agora JAG uza tatika ida hanesan. JAG uza ema CNRT sira hodi halohi povu dehan FRETILIN apoia JAG ho CNRT atu kaer governu. Maibe ita hotu hatene katak ho JAG ho CNRT, korrupsaun, nepotismu ho koluzaun ka KKN sei kontinua buras ba bebeik hanesan iha tempu JAG kaer AMP. JAG ho ema sira iha CNRT, liuliu sira nebe uluk hakuak otonomi khusus, hakarak kontinua ho KKN atu hariku sira nia an.

Tatika Suharto ho GOLKAR nian agora JAG ho CNRT mak lori tomak. Sira lori atributu FRETILIN nian atu lohi povu hodi vota ba sira. Sira uza ema CNRT nian hatais kamizola FRETILIN atu suporta sira. Sira hamosu naran Rezistensia nian oioin deit atu bosok povu dehan rezistensia ho veteranu sira mak ne. Ate ema sira uluk otonomi mos agora representa hotu Resistencia. Ne hatudu katak JAG laiha interese ba povu, ba demokrasia, be etica. JAG so interese mak oinsa hetan kadeira. Ema sira nebe haleu JAG kontenti tamba se povu konfuazun ona, povu bele vota ba sira atu sira kontinua ho pratica KKN iha governu foun.

Ida ne perigozu tebtebes ba futuru nasaun Timor-Leste nian!!! Ita tenki matan moris neon nain.

VOTA BA CNRT = VOTA BA KKN, VOTA BA KORRUPSAUN, VOTA BA MILISIA HO OTONOMISTA SIRA!!!

Vota ba CNRT = Vota Gil Alves ba Ministru das Finansas

"Ramos Horta: Labele Husik Nasaun Ne’e Monu Ba CNRT"

Jornal Nacional Diario - Kinta, 14 Junu 2012

Laureadu Nobel da Paz 1996 no mos eis Prezidenti Republika, Jose Ramos Horta, hateten katak, se hakarak nasaun ne’e lao ba oin, maka rejultadu eleisaun ba ukun, tinan ne’e, la bele monu ba CNRT nia liman.

"Hau rona Bisu-Bisu iha Dili katak, CNRT maman Gil Alves ba Ministru Financas, Francisco Kalbuady Lay, eis Jenderal Danding Kalbuadi nia oan hakiak ba Ministru Defesa, ne’e duni ita boot sira sukat didiak, se ita boot sira preokupadu ho kontratu eletrisidade bele vota karik ba CNRT, maibe hau hateten maun xanana ema diak, nia hakarak iha mandatu foun hakarak hamos tiha korupsaun, maibe ita haree lista CNRT ne’e halo hau preokupadu mos.

Ita boot sira hakarak nasaun ne’e la’o ba oin, hau lakohi atu monu fali ba ema balun nia liman ne’ebe oras ne’e dadaun nakonu iha CNRT, hau fiar PD katak ita boot sira sei fo votu ba PD," afirma Ramos Horta, wainhira partisipa serimonia deklarasaun komunidade suku Beco apoiu PD, Tersa kalan (12/6).

Horta mos dehan, Partidu CNRT ne’e partidu rejistensia, tanba Francisco Kalbuadi ho Gil Alves no sira seluk tan ne’ebe iha lista CNRT nian mos rejistensia hotu.

Jose Ramos Horta mos dehan," hau husu ba imi, atu muda imi nia moris vota ba PD, bainhira hakarak nasaun ne’e lao ba oin, laos vota fali ba Partidu Surik mas, aituri-laran, no hudi-laran," Horta Sublinha ho hamnasa.

Husi Gil Alves to'o Antonio Cardoso

 Tansá mak ema sira ho karákter aat de'it mak buka hakbesik ba Señór José Alexandre Gusmão (JAG)? Resposta ne'e simples. 

JAG hakarak hakuak ema hotu-hotu. Ida ne'e mak JAG nia frakeza. Ema ne'ebé karákter di'ak no forte, sira la presiza tabele ba JAG tanba sira bele buka rasik ba sira nia an. Sira ne'ebé laiha karákter no la konsege kontrola sira nia an, sira laiha kbiit atu buka rasik ba sira nia an. Sira sadere ba JAG atu uza JAG hanesan karreta atu hetan sira nia objetivu privadu. Ezemplu mak ema sira hanesan Gil Alves, ministru MTCI iha governu AMP no eis portavós ba milísia pro-otonomi Besi Merah Putih (BMP) no BRTT. Iha bapa nia tempu Gil Alves sadere ba bapa sira atu buka di'ak ba ninia an. Gil Alves até prontu atu sakrifika ninia maluk Timor-oan sira atu mantén ninia kadeira. Iha Masakre Igreja Liksá iha fulan Abríl 1999, milísia Besi Merah Putih oho ema 200 resin tan de'it ema sira ne'e hakribi otonomia ho Indonézia. Maibé Gil Alves laiha simpatia nein ida ba vítima sira ne'e. Gil Alves defende maka'as milísia Besi Merah Putih hodi dún kulpa ba vítima sira ho FALINTIL sira. Ema 200 resin mak mate, inklui feto ho labarik sira, ferik ho katuas sira, joven sira, no ema inosente barbarak tan. Mabé ohin loron Gil Alves mak ministru MTCI, JAG rasik mak tau nia iha ne'ebá. Atu ko'alia loos de'it, se la lori JAG karik, Gil Alves nunka atu sai ministru ka tuur iha fatin ne'ebé iha asesu ba podér iha nasaun independente ne'ebé ninia vítima sira iha Masakre Igreja Liksá defende. Ida ne'e JAG nia frakeza i Gil Alves nia forsa.

Hanesan Gil Alves, António Cardoso mós laiha karákter. Cardoso iha ona lia-sakat ho ninia kolega sira iha parlamentu durante debate kona-ba kareta luxu PAJERO ba deputadu sira (bele sani tan iha ne'e, no mós iha ne'e). Nu'udár estratéjia ida JAG uza atu fera bloku FRETILIN nian iha Uma Fukun, Cardoso mós monu iha laran lalais de'it. Maske deputadu bloku FRETILIN nian tomak (menus deputada Cipriana Pereira) rejeita programa governu AMP ne'e, tanba programa ne'e buka atu fó de'it benefísiu ba ema elite sira, Cardoso suporta maka'as. Cardoso nia karákter fraku tan ne'e nia la konsege kontrola nia an hodi hamriik hamutuk ho ninia kolega ho camarada sira seluk iha Uma Fukun. Tentasaun atu tuur iha fatin komfortavel, iha sa'e karreta luxu ho AC, boot liu duké Cardoso nia kometimentu ba prinsípiu humanista no solidaridade FRETILIN nian. Cardoso simu PAJERO ne'e ho liman-rua, ho kontente, ho hamnasa. Husi ne'e kedas, ema hotu-hotu koñese sé duni mak camarada, sé duni mak defende prinsípiu humanista, solidaridade ho igualdade ne'e, no sé mak la defende. Cardoso revela nia an ba ninia camarada sira, nia ne'e sé. Ho moe-boot, Cardoso hahú hado'ok an kedas husi ninia camarada sira iha Uma Fukun, no mós husi FRETILIN. Cardoso hatene kedas husi ne'e katak nia foti ona risku boot ida. Nia simu PAJERO ne'e, entaun nia laiha tan xanse atu reprezenta FRETILIN iha lejislatura foun. Tan ne'e Cardoso buka kedas dalan seluk atu kontinua goza ho priviléjiu ne'ebé uluk nia aproveita FRETILIN hodi hetan. Cardoso mak hili uluk atu lori FRETILIN nia naran ba apoia Komandante Taur Matan Ruak kontra Komandante Lu Olo, Prezidente FRETILIN. Agora Cardoso lori fali FRETILIN nia naran ba apoia JAG ho CNRT. Carsoso konfia katak ho Komandante Taur nia manán, tau tan ho JAG/CNRT, Cardoso sei kontinua goza nafatin ho priviléjiu ne'ebé iha tinan 10 nia laran nia moris toman. Tantu Gil Alves, tantu Cardoso, sira laiha diferensa boot. Enkuantu JAG sei moris, sira kontinua hariku sira nia an.

Sé loos mak sala iha ne'e? La'ós Cardoso, la'ós Gil Alves. JAG mak sala. Se karik JAG ema ida matenek no laran-moos, nia sei la hili ema sira karákter laiha hanesan Gil Alves no Cardoso. Se JAG iha hanoin di'ak ba justisa ba povu ki'ik kiak sofre na'in sira ne'e, nia tenke hakribi ema hanesan Gil Alves ho António Cardoso, ho sira seleuk tan, hanesan João Câncio Freitas, Lucia Lobato no Abilio Lima. Maibé JAG la konfia nia an, tan ne'e nia buka no prontu simu apoia husi sé-sé de'it, inklui diabu ho milísia ohodór sira.

Ohin Cardoso dehan nia mak lidera FRETILIN Rezisténsia. Maibé realidade hatudu katak Cardoso nunka moris kalan ida iha ai-laran ho kilat hasoru bapa sira. Se Cardoso mak lidera FRETILIN Rezisténsia, ne'e ita tau fali ema sira hanesan Lu Olo, Somotxo, '55', David Ximenes 'Mandati', ho FALINTIL barak tan, ba iha ne'ebé? Karik JAG ne'e ema ida beik to'o pontu ida hodi fiar katak Cardoso ne'e lidera duni FRETILIN Rezisténsia? JAG nia ulun iha ne'ebé loos?

Iha karik ne'e hatudu notísia ida husi tinan 2011 bainhira estudante sira iha UNDIL akuza Cardoso katak nia uza sala osan universidade nian ba nia an rasik. Cardoso buka oportunidade hotu-hotu atu hariku nia an. Husi simu kareta PAJERO to'o na'ok duni osan eskola nian. Ida ne'e mak JAG hakarak.

Deskonfia Reitor UNDIL Koruptu Osan “Cardoso: Hau Prontu Hatan”
Jornal Timor Post - Kuarta-feira, 30 Novembru 2011

Estudante Universidade Dili (UNDIL) deskonfia Reitor UNDIL Antonio Cardoso koruptu osan subsidiu ne’ebe apoiu husi Gabinete Primeiru Ministru atraves Asesoria sosiedade Sivil.

Estudante hato’o informasaun ne’e iha sesaun husu no hatan iha seminariu (Kuliah Umum) ne’ebe mak fo husi Vise Primeiru Ministru Jose Luis Guterres iha Kampus UNDIL, Tersa (29/11).

Estudante ida ho naran Maubere hato’o problema ne’e, relasiona ho situasaun Universidade ne’ebe mak durante tinan barak ona seidauk hetan akreditasaun husi estadu.

“Ami hakarak hatene orsamentu ne’ebe mak subsidiu husi Governu ne’e agora iha ne’ebe no rejultadu saida, keta halo osan ne’e fo han balun deit ou keta tama fali ba balun nia bolsu,” maubere Preokupa.

Tanba ne’e, nia hakarak eziji para reitor tenki esplika orsamentu ne’ebe mak subsidiu husi governu.

Relasiona ho ezijensia ne’e, Reitor UNDIL Antonio Cardozo hatan katak, orsamentu ne’ebe mak subsidiu husi Governu uza tuir duni ninia sistema no formatu ne’ebe mak tuir dalan transparansia.

Tuir nia katak, orsamentu hamutuk U$24.000 maka subsidiu husi governu, osan ne’e balun mos gasta ba hadiak laboratorium, biblioteka, hadiak kampus, selu dosente no gasta ba atividade saida deit maka la’o iha universidade.

Ne’eduni, Cardoso pronto hatan ba tribunal relasiona ho akuzasaun husi estudantes.

“Hau pronto atu ba hatan iha tribunal, tamba orsamentu laos hau mak kaer, maibe imi tenki hatene katak osan iha tezoreiru nia liman,” nia akresenta.

Entertantu, estudante ida ne’ebe lakohi temi nia naran, husu ba ekipa auditoriu husi Gabinete Primeiru Ministru atu halo audit ba osan refere, tuir nia katak, so audit mak bele termina se mak sala no loos, se lae, ita dehan bosok malu deit.

Hakuak, rei ema kiak sira bainhira presiza sira. Iha tempu di'ak, hakuak mak malae sira.

Poítiku sira uza maneira oioin hodi esplora povu ki'ik nia ignoránsia. Husi matan-been turu to'o hakuak amá-ferik sira, laiha ema ida mak prátiku liu halo sandiwara ida ne'e hanesan Señór José Alexandre Gusmao (JAG). Durante JAG kaer governu AMP, nia nunka tun ba halibur ho povu kiik kiak sira, muintu menus atu hakuak ferik sira hanesan iha foto ne'e. JAG hakribi ema kiak sira. JAG nia moris nu'udár membru elite kiik-oan iha Dili, ne'ebé kaer hotu podér ekonómiku no polítiku, la hanesan ho saida mak nia hatudu iha tempu kampaña ne'e.

JAG loro-loron halibur ho malae sira, han-hemu hanesan ema elite sira, nia oan sira bá eskola eskluzivu ba ema riku sira iha Dili International School, loron feriadu JAG ba nia feen nia rain iha Austrália, JAG hatais roupa luxu husi Europa ho Amérika, JAG ho família sa'e karreta Toyota Land Cruiser foun (kusta $120,000 ba leten), i bainhira JAG ka ninia família oras, sira la bá ospitál iha Dili maibé ba halo tratamentu iha Austrália ou Singapura.

Iha tempu ne'ebé JAG kaer ukun, JAG la presiza bá hakuak ferik sira ne'e ka povu ki'ik sira. Maibé JAG hakuak mak malae sira, hanesan feto oan sira iha foto ne'e hatudu. Iha Dili, atu distrai uitoan, JAG halibur nia an ho malae sira ka ema riku sira hanesan Jorge Serrano nia família. Sira han di'ak, hemu di'ak. JAG ho ninia família laiha ligasaun ida ho povu kiak sira. JAG la hatene no la kompriende saida mak povu kiak sira esperiénsia no sofre. JAG ne'ebé uluk Timór-oan tomak koñese ho naran Kay Rala Xanana ohin loron la'ós ona. Ohin loron JAG ba malae ho ema elite sira de'it. Iha tempu eleisaun mak JAG bá buka povu ki'ik kiak sira atu sisi sira-nia votu.

Imajen ida ne'e atu hatudu oinsá JAG insulta povu ki'ik no kiak sira. JAG uza sira nia beik no ignoránsia iha ninia kampaña atu mantén ninia fatin iha elite ki'ik eskluzivu ne'e. Foto ne'e la'ós hatudu JAG nia domin ba povu ki'ik kiak sira. Maibé hatudu JAG nia laran-metan, ne'ebé só hatene ema ki'ik kiak sira bainhira presiza. Iha tempu di'ak JAG hakuak mak malae ho ema riku sira.

Marabia 1980: Husi Mandati, Somotxo to'o '55'

Sobrevivente ho vítima sira husi akontesimentu "Marabia", 10 Juñu 1980.

Iha Domingu foin daudauk marka loron importante ida iha ita-nia istória. Iha loron 10 fulan Juñu 1980, ita-nia rezisténsia lansa atake oioin hasoru bapa sira iha Dili laran. Atake ne’e mosu hafoin asu’ain Saudozu Nicolau Lobato nia mate no mós masakre boboot sira seluk ne’ebé bapa sira komete hasoru povu Maubere iha tinan 1979 nia rohan. Maibé iha loron ne’e rezisténsia armada fila ataka fali bapa sira iha Dili laran, ho asaltu hasoru paiól Kompi B husi Batallaun 744 iha Becora no mós pos Indonézia nian iha Marabia, besik Dare. Estratéjia ba atake ne’e nu’udár sinál ida ba rai-li’ur katak rezisténsia hasoru bapa sira kontinua—funu sei nafatin! Figura ne’ebé lidera asaltu ne’e mak Sr David Dias Ximenes “Mandati”, militante no membru parlamentu FRETILIN.

David Xinebes "Mandati", komandante asaltu "Marabia"

Akontesimentu iha loron 10 fulan Juñu ne’e eventu ida importante ba ita-nia istória. Ita konsege hatudu ba mundu tomak, loke mundu nia matan katak povu Maubere la hakiduk, katak “a luta continua”. Maske nune’e, ema barak mós sai vítima iha bapa nia liman-laran bainhira bapa sira halo kontra-atake. Forsa Indonézia kaer hotu ema sira ne’ebé sira deskonfia iha ligasaun ho rezisténsia, inklui família tomak iha uma-laran ida. Bapa lori vítima sira ne’e ba halo inkiéritu no submete sira ba tortura oioin atu halo sira sai ezemplu ba ema seluk ne’ebé hanoin kontra bapa sira.

CAVR nota katak bapa sira kaer mós Venancio Gomes (Mau Seran), membru Comité Centra FRETILIN, iha ninia uma, depois lori nia ba KODIM. Iha KODIM Mau Seran hetan tortura maka’as husi bapa sira. Depois bapa sira tula fali nia ho elikópteru ba Remexiu i tiru mate nia iha ne’ebá. Tuir sasin sira, bapa sira husik de’it Mau Seran nia isin dodok iha rai ba asu han.

Bapa sira mós kaer ema atus ba atus relasiona ho akontesimentu ne’e. Balu iha duni ligasaun, seluk populasaun sivíl no inosente. Balu bapa sira oho ka lori-lakon, seluk bapa sira lori ba desterra hotu iha Atauro, inklui feto ho labarik sira.

Atauro: Uma ba funu-na'in sira hafoin hetan kastigu.

Iha loron Domingu ne’e, família no sobrevivente sira husi akontesimentu “Marabia” halo komemorasaun ki’ik oan ida hodi marka tinan 32 ba insurreisaun ida ne’e. Infelizmente, iha loron ne’e, na’i-ulun estadu sira ne’ebé hetan konvite, nein ida mak marka ninia prezensa. Na’i-ulun sira ikus ne’e, tuur ona iha kadeira no hetan ona moris-di’ak, haluhan tiha ona sakrifísiu boot ne’ebé ema seluk oferese hodi sira goza URA.

Ita hanoin mós to’o sira be hanaran an “FRETILIN Rezisténsia”. Sira iha ne’ebé? Klaru katak sira la hatene buat ida kona-ba etapa importante ida ne’e, ne’ebé FRETILIN rasik mak sai protagonista. Ne’e halo ita hotu deskonfia sira nia papél iha rezisténsia armada, rezisténsia ne’ebé FRETILIN lidera. Ba sira atu hanaran an FRETILIN Rezisténsia, ne’e insultu boot ida ba istória FRETILIN nian, isultu ida ba istória rezisténsia nian, insultu boot idamós ba povu Maubere nia sofrimentu. De faktu, até “lider másimu rezisténsia” José Alexandre Gusmão rasik laiha ideia ida kona-ba akontesimentu Marabia ne’e. Ou sira haluhan tanba sira laiha interese, ou sira laiha kontribuisaun substánsial ida ba rezisténsia hasoru bapa sira. Maibé ohin loron sira mak goza ho URA hamutuk ho indivíduu barak, ne’ebé iha tempu Timor-oan sira sofre, sira kolabora ho bapa atu nega URA ba povu Maubere. Ida ne’e mak istória ho realidade ohin-loron nian.


Istória funu URA nian la’ós buat ida kmaan duni ba ema barak, liuliu sira ne’ebé uluk hamutuk ho bapa sira hodi nega Ukun Rasik An (URA) ba povu Maubere. Ema barak mak prefere ita hotu haluhan tiha ita-nia istória luta nian tanba istória loloos, lia-loos, sei revela ema sira ne’e nia pasadu, ne’ebé nakonu ho egoizmu, oportunizmu, i piór liu, traisaun ho krime kontra povu Maubere. I ema sira ne’e, balu ohin loron kaer kompañia boboot. Seluk, kaer kargu boot iha iha governu, iha defeza ho seguransa, iha edukasaun, iha turizmu ho komérsiu, no fatin xave sira seluk. Sira iha asesu ba podér, ba ema sira ne’ebé kaer podér, atu halo sasán tuir sira-nia hakarak.

Infelizmente ba Timor-oan sofre-na’in sira, ho vida ne’ebé nakonu ho susar hafoin periodu URA, sira laiha tempu atu gasta ba kestaun “insignifikante” sira hanesan ne’e (insignifikante bainhira kompara ho kestaun han-hemu loro-loron nian). Até sira nia “lider másimu rezisténsia” mós, Sr José Alexandre Gusmão (JAG), uluk koñesidu ho naran funu Kay Rala Xanana, taka matan hotu ba realidade istórika ida ne’e. Sr JAG dehan nia hakarak lori dezenvolvimentu mai Timór-oan sira. Maibé dezenvolvimentu ida laiha. Dezenvolvimentu iha de’it ba integrasionista ho otonomista sira, ne’ebé JAG lori mai tama lutu-laran. Ohin loron, ho polítika Rekonsiliasaun, sira obriga Timór-oan moris ho amnézia ba ita-nia istória. Amnézia ne’e loke dalan ba ema barak atu aproveita oportunidade ne’ebé iha.

Entaun sira mai lohi povu Maubere tomak katak iha grupu rezisténsia ida ne’e, ida ne’ebá, ho seluk-seluk tan. Maibé sira haluhan tiha veteranu asli ne’ebé uluk tau sira nia vida iha perigu laran atu hadau URA. Ohin loron, veteranu fotokopi sira dehan sira funu to’o tinan 8, até balu uluk servisu ho bapa mós hetan rekoñesimentu boot liu fali. Veteranu asli sira, ema cap fali tinan 3 de'it. Veteranu asli sira sa’e bis ho mikrolet tun-sa’e foho, veteranu falsu sira kaer projetu boboot, sa’e Prado ho Pajero, bá-mai Jakarta ho Bali. Veteranu falsu sira dehan sira mak lidera rezisténsia, veteranu asli sira, sira tau tiha ba kotuk. Veteranu fotokopi sira dehan sira mak FRETILIN Rezisténsia maibé balu uluk kolaboradór. Sira tau fali veteranu asli sira hanesan Mandati, Somotxo ho “55”, ne'ebé lidera duni funu to'o ukun-an ba tiha kotuk. Amnézia istórika halo povu sofre na’in sira taka matan ba buat injustisa sira hanesan ne’e, i sira aproveita!

Somotxo, Komandante Konis Santana nia brasu-direitu, hatete katak so FRETILIN mak bele rezolve kestaun veteranu nian.

FRETILIN/FALINTIL verdadeiru sira sei lori esperansa mai ita atu tau fali istória loloos iha ninia fatin. Ohin loron Mandati, Somotxo”, “55”, hamutuk ho Lu Olo, ne’ebé kaer kilat tinan 24 tomak nia laran, mak hanesan lasu hodi kaer metin mehi revolusaun tinan 1974 nain, hodi kontinua haburas mehi husi Saudozu Nicolau Lobato, Mau Kruma, Mau Lear, Sahe, Konis Santana, Mau Hodu, ho seluseluk tan. FRETILIN mak ida ne’e de’it, ne’ebé Lu Olo ho Mari Alkatiri lidera. Se ida ne’e la’ós FRETILIN, bele fiar katak Mandati, Somotxo, “55” ho antigus kombatentes sira seluk sei abandona hotu.

Loron boot akontesimentu Marabia iha Domingu ne’e hatudu dala ida tan katak FRETILIN falsu ohin loron barak duni. FRETILIN Rezisténsia maibé la hatene buat ida kona-ba rezisténsia? Ida ne’e oportunista sira mak halo atu buka di’ak ba an rasik.

Ignoránsia husi ema sira ne’e ba loron istóriku hanesan akontesimentu Marabia ne’e mak sei ajuda eleitór sira hili: sé mak iha fuan atu hasa’e Timor-Leste, no sé mak iha interese ba ninia an rasik de’it. Povu sei hili lia-loos.